Guddoomiyaha Cusub ee Gobolka Banaadir ahna duqa Muqdisho Xildhibaan Maxamed Axmed Nuur (Tarsan) ayaa sheegay in qof walba oo lagu qabto isagoo dadka dhibaatooyin u geysanaya lagu xukumi doono Diinta Islaamka.

Duqa Muqdisho ayaa hadalkan sheegay kaddib markii uu shir kula qaatay xarunta Gobolka Banaadir waxgaradka Magaalada Muqdisho, isagoo sheegay in dowladdu ay ku dhaqmayso diinta Islaamka.

"Qofkii lagu qabto isagoo dadka dhac u geysanaya waxaa marsiin doonaa sharciga Islaamka, waxaana uu weyn doonaa naftiisa ama gacmihiisa" ayuu yiri Tarsan oo sheegay in maamulkiisa uu hirgelinayo ku dhaqanka Islaamka.

Sidoo kale wuxuu sheegay in qof walba oo la qabto isagoo dil geystay lagu xukumi doono dil, wuxuuna sheegay in amar ay soo saareen kaddib ay yaraadeen ciidanka hubka la dhex jooga dadka shacabka ah ee aan waxba galabsan.

Mas^uulkan ayaa noqonaya kii ugu horreeyay oo ka tirsan Dowladda Somalia oo sheega inuu ku xukumayo dambiilayaasha la qabto diinta Islaamka, wuxuuna xusay in la furayo Maxakamdaha Gobolka Banaadir iyagoo diinta Islaamka wax ku xukumaya.

Afhayeenka Golaha Odayaasha Muqdisho Axmed Diiriye Cali oo isaguna ka hadlay kulanka ayaa uug baaqay shacabka iyo ganacsatada inay taageeraan Maamulka cusub ee Gobolka Banaadir oo uu xusay inay diyaar u yihiin inay wax qabtaan.